Maʼlumot

Foydalanish shartlari

FOYDALANUVCHI KELISHUVI

(«UMRABOR» PLATFORMASI FOYDALANUVCHILARI UCHUN OMMAVIY OFERTA)

Mazkur Foydalanuvchi kelishuvi (keyingi o'rinlarda — «Kelishuv») «UMRABOR» onlayn platformasining egasi bo'lgan «RUVEX» mas'uliyati cheklangan jamiyatining (keyingi o'rinlarda — «Agregator») rasmiy ommaviy ofertasi hisoblanadi hamda «UMRABOR» platformasining (keyingi o'rinlarda — «Platforma») axborot-texnologik infratuzilmasidan jismoniy shaxslar (keyingi o'rinlarda — «Foydalanuvchilar» / «Mijozlar») tomonidan foydalanish shartlarini belgilaydi.

O'zbekiston Respublikasi Fuqarolik kodeksining 369-moddasiga muvofiq, Platformada ro'yxatdan o'tish, Shaxsiy kabinet yaratish yoki bron qilish uchun ariza rasmiylashtirish mazkur ofertaning akseptI deb e'tirof etiladi va bu quyida bayon etilgan shartlar asosida ikki tomonlama yozma shartnoma tuzishga yuridik jihatdan tenglashtiriladi.

1. ATAMALAR VA TA'RIFLAR

  • Agregator (UMRABOR Platformasining egasi) — Merchantlar va Foydalanuvchilarning o'zaro hamkorligi uchun axborot-texnologik maydonchani taqdim etuvchi «RUVEX» MChJ.

  • Platforma — umrabor.uz veb-sayti (barcha subdomenlar bilan birga) va/yoki UMRABOR mobil ilovasi — ziyorat turlarini qidirish, taqqoslash, shakllantirish va to'lash uchun AT-tizim.

  • Platforma interfeyslari — Agregator, Merchant va Foydalanuvchilar o'rtasida texnik aloqani ta'minlovchi, Platforma bilan o'zaro hamkorlikning vizual-dasturiy muhitlari. Mijoz interfeysiga quyidagilar kiradi: umrabor.uz asosiy veb-sayti va uning mobil versiyalari; iOS va Android uchun rasmiy mobil ilovalar; integratsiyalashgan to'lov tizimlari va messenjerlar (jumladan Telegram, WhatsApp) ichidagi mini-ilovalar va veb-vidjetlar; chat-botlar va Agregator ma'lumotlar bazalari bilan integratsiyalashgan boshqa dasturiy modullar.

  • Merchant — O'zbekiston Respublikasi qonunchiligida ruxsat etilgan har qanday shaklda tadbirkorlik faoliyatini amalga oshiruvchi, «Umra» tadbirlarini tashkil etish bo'yicha maxsus litsenziyaga ega bo'lgan (O'zbekiston Respublikasi Vazirlar Mahkamasining 668-son qarori asosida), o'z turpaketlarini Platformada joylashtiruvchi hamda Platformaga bekor qilish, pul mablag'larini qaytarish va ziyoratchini almashtirish shartlari ko'rsatilgan turistik xizmatlar ko'rsatish bo'yicha o'z shartnomasini yuklovchi shaxs.

  • Foydalanuvchi — Platformadan ziyorat turlari haqidagi ma'lumotlarni qidirish, ko'rish va taqqoslash uchun foydalanuvchi jismoniy shaxs.

  • Mijoz — o'zi uchun va/yoki uchinchi shaxslar (Hamrohlar) manfaatlarida ziyorat turini bron qilish uchun arizani rasmiylashtirgan va to'lagan Foydalanuvchi.

  • Hamroh — manfaatlarida Mijoz ziyorat turini rasmiylashtiradigan va shaxsga doir ma'lumotlarini Mijoz Platformaga kiritadigan uchinchi shaxs.

  • Ziyorat turi (Turpaket) — faqat Merchant tomonidan shakllantiriladigan, sotiladigan va bajariladigan turistik va diniy xizmatlar majmui (viza, parvoz, transfer, mehmonxona, gid).

  • To'lov tizimi — Platformaga integratsiyalashgan to'lovlarni qabul qilish xizmati (masalan, CLICK), to'lovni qabul qilishni va to'lov summasini texnik taqsimlashni (split), shuningdek tegishli buyruqlar bo'yicha mablag'larni qaytarishni (revers) amalga oshiradi.

  • Split — To'lov tizimi tomonidan to'lov paytida to'lov summasining oldindan sozlangan qoidalarga muvofiq Merchant va Agregator o'rtasida avtomatik taqsimlanishi. Agregator Mijozlarning pul mablag'larini o'z hisobvaraqlarida jamg'armaydi.

  • Revers (qaytarish) — arizaning bekor qilinishi natijasida kelib tushgan buyruq asosida boshlanadigan, To'lov tizimi tomonidan Mijozga oldin to'langan summani qaytarish operatsiyasi.

2. PLATFORMANING HUQUQIY MAQOMI

2.1. Agregator faqat axborot-texnologik xizmatlarni (Platforma infratuzilmasini) taqdim etadi va O'zbekiston Respublikasining «Elektron tijorat to'g'risida»gi Qonuni doirasida faoliyat yuritadi.

2.2. Agregator turoperator, turagent yoki to'lov agenti hisoblanmaydi, turistik, ekskursiya yoki diniy xizmatlar ko'rsatmaydi, ziyorat turlarini shakllantirmaydi va Mijoz bilan Merchant o'rtasidagi turni oldi-sotdi bitimining tomoni sifatida ishtirok etmaydi. Agregator Foydalanuvchilarning pul mablag'larini o'z hisobvaraqlarida jamg'armaydi, ushlab qolmaydi va saqlamaydi. To'lovni texnik taqsimlash (split) va mablag'larni qaytarish To'lov tizimi tomonidan oldindan sozlangan qoidalar va kelib tushgan buyruqlar asosida amalga oshiriladi; Agregator tomonidan bunday qoidalarning texnik sozlanishi uni hisob-kitoblarning tomoni yoki to'lov agenti qilmaydi.

2.3. Turistik mahsulotni (ziyorat turini) sotish to'g'risidagi shartnoma bevosita Mijoz va aniq Merchant o'rtasida tuziladi. Shartnoma Mijoz tanlangan tur uchun to'lovni amalga oshirgan paytda tuzilgan hisoblanadi. Turni bajarish bo'yicha barcha huquqlar, majburiyatlar va yuridik javobgarlik faqat Merchantda vujudga keladi.

2.4. To'lov amalga oshirilgunga qadar Mijozga Platforma interfeysida shartnoma tuziladigan Merchant to'g'risidagi ma'lumotlar (nomi, rekvizitlari, «Umra» tadbirlarini tashkil etish litsenziyasi raqami), shuningdek Merchantning turistik xizmatlar ko'rsatish shartnomasi matni taqdim etiladi. Ziyorat turpaketini tanlash va shakllantirishda Mijoz tegishli Merchant shartnomasining shartlari, jumladan bekor qilish, pul mablag'larini qaytarish va ziyoratchini almashtirish bo'limi bilan tanishishi shart. Rozilik belgisini («galochka») qo'yish yoki to'lovni amalga oshirish Merchant shartnomasi shartlarining, iste'molchilar huquqlarini himoya qilish to'g'risidagi qonunchilikning imperativ normalariga zid bo'lmagan qismida, aksepti deb e'tirof etiladi.

2.5. Merchantlarning shartnomalari Platformada Platforma faoliyat yuritayotgan tillarda joylashtiriladi.

2.6. Agregator Merchant va Mijoz o'rtasidagi bitim bo'yicha hammuallif, kafil yoki agent hisoblanmaydi hamda Mijozning Merchant shartnomasi shartlari bilan tanishmaganligi yoki ularni to'liq tushunmaganligi oqibatida yuzaga kelgan da'volar uchun javobgarlik ko'tarmaydi.

3. TOMONLARNING HUQUQ VA MAJBURIYATLARI

3.1. Foydalanuvchi (Mijoz) majburiyat oladi:

  • Ziyorat turlarini bron qilish va to'lashni O'zbekiston Respublikasi qonunchiligi talablariga, jumladan muomala layoqatiga oid talablarga muvofiq amalga oshirish. Ko'rsatilgan talablarga rioya qilish uchun javobgarlikni Mijoz ko'taradi.

  • Hamrohlarning ma'lumotlarini O'zbekiston Respublikasi qonunchiligi talablariga, jumladan yosh va muomala layoqatiga oid talablarga muvofiq kiritish. Hamrohlar ma'lumotlarini kiritishning qonuniyligi va taqdim etilgan ma'lumotlarning haqqoniyligi uchun javobgarlikni Mijoz ko'taradi.

  • Ro'yxatdan o'tishda va bron qilishda haqqoniy, dolzarb va to'liq shaxsga doir ma'lumotlarni (o'ziniki va Hamrohlarnikini) mazkur Kelishuvning 6-bo'limiga muvofiq taqdim etish.

  • Har bir Hamrohning shaxsga doir ma'lumotlarini mazkur Kelishuv shartlarida qayta ishlash va uzatishga roziligi O'zbekiston Respublikasi qonunchiligida belgilangan tartibda olinganligini kafolatlash. Bunday rozilik mavjud bo'lmaganligi uchun javobgarlikni Mijoz ko'taradi.

  • Shaxsiy kabinet login va parolining saqlanishini mustaqil ravishda ta'minlash. Shaxsiy kabinetdan amalga oshirilgan har qanday harakatlar Foydalanuvchi tomonidan shaxsan sodir etilgan deb e'tirof etiladi.

  • Tanlangan turlar uchun to'lovni integratsiyalashgan To'lov tizimi orqali o'z vaqtida va to'liq hajmda amalga oshirish.

  • Ziyoratni amalga oshirish uchun zarur bo'lgan chet el pasportlari, viza rejimlari va tibbiy talablarni mustaqil ravishda tekshirish.

  • Arizani rasmiylashtirishdan oldin tegishli Merchant shartnomasining shartlari, jumladan bekor qilish, qaytarish va ziyoratchini almashtirish shartlari bilan tanishish.

3.2. Foydalanuvchi (Mijoz) huquqqa ega:

  • Platformaning axborot funksionalidan turlarni qidirish, taqqoslash va turlarni shakllantirish uchun arizalar yuborish maqsadida bepul foydalanish.

  • Shaxsiy kabinet va Platforma interfeysi faoliyati bo'yicha texnik yordam olish.

  • Merchantga Platforma interfeysi orqali shartnomani bajarish bilan bog'liq rasmiy murojaatlar yuborish: turni tashkil etish va o'tkazish masalalari; bron qilingan turni bekor qilish (annulyatsiya) to'g'risidagi arizalar; pul mablag'larini qaytarish so'rovlari; Hamrohni almashtirish arizalari; Merchant ko'rsatgan xizmatlar sifatiga da'volar.

  • Tomonlar Shaxsiy kabinet orqali murojaatlar yuborishni Mijoz va Merchant o'rtasidagi rasmiy va ustuvor aloqa usuli deb e'tirof etadilar. Bunday murojaatlar Merchant kabinetiga qayta yo'naltiriladi; Platforma ularning yuborilgan fakti va vaqtini qayd etadi.

  • Agar Merchant Mijozning murojaatiga javob bermasa, Mijoz Platformaning texnik yordam xizmatiga murojaat qilish huquqiga ega. Platforma murojaatni ro'yxatga oladi va uni Merchantga uzatish hamda eskalatsiya qilishda ko'maklashadi. Bunda Platforma Merchantning majburiyatlarini o'z zimmasiga olmaydi, Merchant tomonidan u yoki bu qaror qabul qilinishini va pul mablag'larining qaytarilishini kafolatlamaydi; murojaatlarni Merchant tomonidan ko'rib chiqish muddatlari Merchant va Agregator o'rtasidagi shartnoma bilan belgilanadi.

3.3. Agregator majburiyat oladi:

  • Rejali texnik va profilaktika ishlari davrlari bundan mustasno, Platformaning ishlashini ta'minlash.

  • Mijoz tomonidan shakllantirilgan arizalarni va to'lovlar to'g'risidagi ma'lumotlarni AT-infratuzilma orqali tegishli Merchantga o'z vaqtida uzatish.

  • Mijozning Shaxsiy kabinet orqali yuborilgan murojaatlari faktini va vaqtini texnik jihatdan qayd etish.

3.4. Agregator huquqqa ega:

  • Firibgarlik, ma'lumotlarni parsing qilish yoki mazkur Kelishuv shartlarini buzishda asosli shubha bo'lganda ro'yxatdan o'tkazishni rad etish yoki Foydalanuvchining Shaxsiy kabinetini bloklash. Bloklash Mijozni allaqachon to'langan turlar bo'yicha masalalarni hal qilish, jumladan qaytarish to'g'risidagi murojaatlar imkoniyatidan mahrum qilmaydi.

  • Platformaning dizayni, interfeysi va ishlash algoritmlarini, shuningdek mazkur Kelishuv shartlarini 9-bo'limda belgilangan tartibda bir tomonlama o'zgartirish.

4. TO'LOV TARTIBI, HAQ VA MABLAG'LARNI QAYTARISH

4.1. Barcha to'lovlar Mijoz tomonidan integratsiyalashgan To'lov tizimi orqali naqd pulsiz tartibda amalga oshiriladi. Mijoz tanlangan tur qiymatini to'laydi. Agregatorning haqi tur qiymatiga kiritilgan bo'lib, Mijozdan qo'shimcha ravishda undirilmaydi.

4.2. To'lov paytida To'lov tizimi splitni — summaning oldindan sozlangan qoidalarga muvofiq Merchant va Agregator o'rtasida avtomatik taqsimlanishini amalga oshiradi. Agregator Mijozlarning mablag'larini jamg'armaydi; Agregatorning haqi tur qiymatiga kiritilgan ulush bo'lib, To'lov tizimi tomonida Merchantga tegishli summadan ushlab qolinadi.

4.3. Pul mablag'larini qaytarish Merchant tomonidan boshlanadi, mazkur Kelishuvning 4.4-bandida nazarda tutilgan arizani avtomatik bekor qilish holati bundan mustasno. Merchant qaytarish to'g'risida qaror qabul qilganda Platforma interfeysida tegishli buyruq shakllantiriladi, uning asosida Platformada ariza bekor qilinadi, qaytarish esa integratsiyalashgan To'lov tizimi orqali yoki Merchantning Mijoz bilan shartnomasida nazarda tutilgan boshqa usulda amalga oshiriladi.

4.4. Merchant bron qilish uchun arizani (uni tasdiqlash yoki rad etish) u kelib tushgan paytdan boshlab 72 (yetmish ikki) soat ichida ko'rib chiqishi shart; dam olish va bayram kunlari ko'rsatilgan muddatga kiritilmaydi. Agar ko'rsatilgan muddat ichida ariza Merchant tomonidan ko'rib chiqilmasa, Platforma arizani avtomatik ravishda bekor qiladi, Mijoz to'lagan summa esa Mijozga to'liq hajmda (100%) qaytarilishi lozim.

4.5. Agar Merchant bron qilish uchun arizani rad etsa (jumladan bo'sh o'rinlar mavjud emasligi sababli), Mijoz to'lagan summa Mijozga to'liq hajmda (100%) qaytarilishi lozim.

4.6. Agar mazkur Kelishuvning 4.4 va 4.5-bandlarida boshqacha tartib nazarda tutilmagan bo'lsa, bronni bekor qilish va pul mablag'larini qaytarish Merchant tomonidan turpaket sotib olingan paytda amal qilgan Merchant va Mijoz o'rtasidagi shartnoma shartlariga muvofiq amalga oshiriladi. Qaytarilishi lozim bo'lgan summa miqdori, uni to'lash muddatlari va tartibi to'liq ravishda Merchant tomonidan ko'rsatilgan shartnomada belgilangan qaytarish shartlari bilan aniqlanadi. Agregator qaytariladigan summalarni mustaqil hisoblab chiqmaydi va to'lovlarning tashabbuskori hisoblanmaydi.

4.7. Mijoz tomonidan bekor qilish va qaytarish to'g'risidagi murojaat yuborilgan sana va vaqt Platforma tizimi tomonidan qayd etiladi. Qaytarish shartlari murojaat yuborilgan paytga ko'ra belgilanadi, uning Merchant tomonidan haqiqatda ko'rib chiqilgan paytiga ko'ra emas.

4.8. Tur Merchantning aybi bilan bekor qilinganda, Mijoz javobgar bo'lmagan holatlar sababli uni bajarish imkonsiz bo'lganda, shuningdek iste'molchilar huquqlarini himoya qilish to'g'risidagi qonunchilikda nazarda tutilgan boshqa hollarda Mijoz Merchant shartnomasi shartlaridan qat'i nazar, ushbu qonunchilikda belgilangan hajmda qaytarish huquqini saqlab qoladi.

4.9. Arizani ko'rib chiqish muddati o'tishi munosabati bilan uni avtomatik bekor qilish (4.4-band) bundan mustasno, Agregator arizalarni bekor qilishni va mablag'larni qaytarishni mustaqil ravishda boshlamaydi. Boshqa hollarda Platforma tomonida arizani texnik bekor qilish Agregator tomonidan faqat Merchantning rasmiy so'rovi asosida amalga oshiriladi.

4.10. Fiskal chek (to'lovni tasdiqlovchi hujjat) O'zbekiston Respublikasi qonunchiligiga muvofiq integratsiyalashgan To'lov tizimi (to'lov agregatori) orqali shakllantiriladi.

5. INTELLEKTUAL MULK

5.1. Platformaning dizayni, grafik elementlari, logotiplari, dasturiy kodi va ma'lumotlar bazalari tuzilmasi «RUVEX» MChJning intellektual mulki hisoblanadi va O'zbekiston Respublikasining «Mualliflik huquqi va turdosh huquqlar to'g'risida»gi Qonuni bilan himoyalanadi. Platforma elementlarini har qanday nusxalash, yuklab olish (parsing) yoki o'zgartirish taqiqlanadi.

5.2. Platformada sharhlar, izohlar yoki fotosuratlar joylashtirish orqali Foydalanuvchi Agregatorga ushbu kontentdan Platformaning marketing maqsadlarida foydalanish uchun tekin, mutlaq bo'lmagan litsenziya beradi. Foydalanuvchi joylashtirilayotgan kontent uchinchi shaxslarning huquqlarini buzmasligini, tasvirlarda boshqa shaxslar mavjud bo'lganda esa — ularning roziligi olinganligini kafolatlaydi.

6. SHAXSGA DOIR MA'LUMOTLAR

6.1. Mazkur Kelishuvni aksept qilish orqali Mijoz ziyorat turini rasmiylashtirish va bajarish maqsadida o'zining va Hamrohlarning shaxsga doir ma'lumotlarini qayta ishlashga rozilik beradi. Shaxsga doir ma'lumotlarni yig'ish, saqlash, ishlatish va uzatish tartibi umrabor.uz/uz/p/privacy manzilida joylashtirilgan va mazkur Kelishuvning ajralmas qismi hisoblangan «RUVEX» MChJning Maxfiylik va shaxsga doir ma'lumotlarni qayta ishlash siyosati bilan belgilanadi.

6.2. Agregator shaxsga doir ma'lumotlar operatori hisoblanadi. Shaxsga doir ma'lumotlarni yig'ish, tizimlashtirish va saqlash O'zbekiston Respublikasi hududida jismonan joylashgan ma'lumotlar bazalaridan foydalangan holda amalga oshiriladi. Yig'ilgan ma'lumotlar turistik xizmatlar ko'rsatish uchun zarur hajmda tegishli Merchantga uzatiladi; uzatilgan paytdan boshlab Merchant mustaqil operator bo'ladi va ma'lumotlarni o'z javobgarligi ostida qayta ishlaydi.

6.3. Mijoz Hamrohlarning shaxsga doir ma'lumotlarini qonuniy ravishda kiritganligini hamda ularni qayta ishlashga, jumladan turni bajarish uchun zarur bo'lgan transchegaraviy uzatishga (xususan, Saudiya Arabistoni Podsholigi vizasini rasmiylashtirish uchun) rozilik O'zbekiston Respublikasi qonunchiligida belgilangan tartibda olinganligini kafolatlaydi. Bunday rozilik mavjud bo'lmaganligi uchun javobgarlikni Mijoz Siyosatga muvofiq ko'taradi.

7. AGREGATOR JAVOBGARLIGINING CHEKLANISHI

7.1. Agregator turlar, narxlar, mehmonxonalardagi o'rinlar va aviachiptalar mavjudligi to'g'risidagi ma'lumotlarning haqqoniyligi, dolzarbligi va to'liqligi uchun javobgar emas, chunki ushbu kontent Merchantlar tomonidan mustaqil ravishda yuklanadi.

7.2. Agregator tur davomida Mijozga yoki Hamrohlarga yetkazilgan zarar uchun javobgar emas, jumladan, lekin ular bilan cheklanmagan holda: aviareyslarning bekor qilinishi, ko'chirilishi yoki kechikishi va yuklarning yo'qolishi; yashash sharoitlarining e'lon qilingan tavsiflarga mos kelmasligi; gidlar, guruh rahbarlari va Merchant vakillarining harakatlari yoki harakatsizligi; davlat organlarining (jumladan Saudiya Arabistoni Podsholigi) viza berishni yoki chegarani kesib o'tishni rad etishi.

7.3. Agregator xosting-provayderlar, internet-operatorlar, ekvayer-banklar yoki To'lov tizimi tomonidagi texnik uzilishlar uchun javobgar emas, agar ular Platformadan foydalanish imkonsizligiga yoki ko'rsatilgan shaxslar tomonida to'lovlarni amalga oshirishda uzilishlarga olib kelgan bo'lsa.

8. FORS-MAJOR

8.1. Tomonlar majburiyatlarni bajarmaganlik yoki lozim darajada bajarmaganlik uchun javobgarlikdan ozod qilinadilar, agar bu mazkur Kelishuv akseptidan keyin yuzaga kelgan yengib bo'lmas kuch holatlari (tabiiy ofatlar, harbiy harakatlar, hokimiyat organlarining hujjatlari, magistral aloqa va elektr ta'minoti tarmoqlaridagi uzilishlar va favqulodda tusdagi boshqa voqealar) tufayli yuzaga kelgan bo'lsa.

8.2. Ko'rsatilgan holatlardan tashqari, Tomonlar yengib bo'lmas kuch holatlariga ziyoratni tashkil etishga ta'sir qiluvchi maxsus tartibga soluvchi voqealarni ham kiritadilar: Saudiya Arabistoni Podsholigi yoki O'zbekiston Respublikasining vakolatli organlari tomonidan «Umra» kvotalarining bekor qilinishi, qisqartirilishi yoki to'xtatilishi; havo hududining yopilishi; ziyorat joylarida favqulodda sanitariya-epidemiologik cheklovlarning joriy etilishi.

8.3. Yengib bo'lmas kuch holatlarining bron qilingan tur uchun oqibatlari (jumladan turni ko'chirish, almashtirish yoki bekor qilish va Mijoz bilan hisob-kitob tartibi) Merchant va Mijoz o'rtasidagi shartnoma hamda O'zbekiston Respublikasi qonunchiligi bilan belgilanadi.

9. NIZOLARNI HAL QILISH VA KELISHUVGA O'ZGARTIRISH KIRITISH TARTIBI

9.1. Foydalanuvchi va Agregator o'rtasida Platforma faoliyati masalalari bo'yicha nizolar sudgacha da'vo tartibida hal qilinadi. Yozma da'voni ko'rib chiqish muddati — u info@umrabor.uz manziliga kelib tushgan kundan boshlab 15 (o'n besh) kalendar kun.

9.2. Kelishuvga erishilmagan taqdirda nizo O'zbekiston Respublikasining amaldagi qonunchiligiga muvofiq sudda ko'rib chiqilishi lozim. Mazkur qoida Foydalanuvchi-iste'molchining iste'molchilar huquqlarini himoya qilish to'g'risidagi qonunchilikda belgilangan sudlov qoidalari bo'yicha da'vo qo'zg'atish huquqlarini cheklamaydi.

9.3. Ziyorat turining sifatsiz ko'rsatilishi yoki ko'rsatilmaganligidan kelib chiqadigan nizolar va da'volarni Mijoz bevosita Merchant bilan hal qiladi.

9.4. Agregator mazkur Kelishuvga bir tomonlama tartibda o'zgartirishlar kiritish huquqiga ega. Jiddiy o'zgartirishlar kiritilganda Agregator Foydalanuvchilarni Platformada tegishli xabarnomani joylashtirish yo'li bilan xabardor qiladi. O'zgartirishlar yangi tahrir e'lon qilingan paytdan kuchga kiradi.

10. YAKUNIY QOIDALAR

10.1. Mazkur Kelishuv Foydalanuvchi uchun u aksept qilgan paytdan kuchga kiradi va muddatsiz amal qiladi.

10.2. Mazkur Kelishuv o'zbek, rus va ingliz tillarida tayyorlangan va mavjud. Foydalanuvchiga Platforma interfeysining tanlangan tiliga mos keladigan Kelishuv versiyasi ko'rsatiladi. Barcha til versiyalari bir xil yuridik kuchga ega.

11. AGREGATOR REKVIZITLARI

«RUVEX» mas'uliyati cheklangan jamiyati — UMRABOR platformasining egasi

Yuridik manzil: Toshkent shahri, Yakkasaroy tumani, Muhandislar MFY, Sh. Rustaveli ko'chasi, 53

H/r: 20208000007339694001, «Asia Alliance Bank» ATB

MFO: 01095 STIR: 312527894 IFUT: 62010

Direktor: Mamajanov Rustam Yusupjanovich

E-mail: info@umrabor.uz