Фойдаланиш шартлари

ФОЙДАЛАНУВЧИ КЕЛИШУВИ

(«UMRABOR» ПЛАТФОРМАСИ ФОЙДАЛАНУВЧИЛАРИ УЧУН ОММАВИЙ ОФЕРТА)

Мазкур Фойдаланувчи келишуви (кейинги ўринларда — «Келишув») «UMRABOR» онлайн платформасининг эгаси бўлган «RUVEX» масъулияти чекланган жамиятининг (кейинги ўринларда — «Агрегатор») расмий оммавий офертаси ҳисобланади ҳамда «UMRABOR» платформасининг (кейинги ўринларда — «Платформа») ахборот-технологик инфратузилмасидан жисмоний шахслар (кейинги ўринларда — «Фойдаланувчилар» / «Мижозлар») томонидан фойдаланиш шартларини белгилайди.

Ўзбекистон Республикаси Фуқаролик кодексининг 369-моддасига мувофиқ, Платформада рўйхатдан ўтиш, Шахсий кабинет яратиш ёки брон қилиш учун ариза расмийлаштириш мазкур офертанинг аксепти деб эътироф этилади ва бу қуйида баён этилган шартлар асосида икки томонлама ёзма шартнома тузишга юридик жиҳатдан тенглаштирилади.

1. АТАМАЛАР ВА ТАЪРИФЛАР

Агрегатор (UMRABOR Платформасининг эгаси) — Мерчантлар ва Фойдаланувчиларнинг ўзаро ҳамкорлиги учун ахборот-технологик майдончани тақдим этувчи «RUVEX» МЧЖ.
Платформа — umrabor.uz веб-сайти (барча субдоменлар билан бирга) ва/ёки UMRABOR мобил иловаси — зиёрат турларини қидириш, таққослаш, шакллантириш ва тўлаш учун АТ-тизим.
Платформа интерфейслари — Агрегатор, Мерчант ва Фойдаланувчилар ўртасида техник алоқани таъминловчи, Платформа билан ўзаро ҳамкорликнинг визуал-дастурий муҳитлари. Мижоз интерфейсига қуйидагилар киради: umrabor.uz асосий веб-сайти ва унинг мобил версиялари; iOS ва Android учун расмий мобил иловалар; интеграциялашган тўлов тизимлари ва мессенжерлар (жумладан Telegram, WhatsApp) ичидаги мини-иловалар ва веб-виджетлар; чат-ботлар ва Агрегатор маълумотлар базалари билан интеграциялашган бошқа дастурий модуллар.
Мерчант — Ўзбекистон Республикаси қонунчилигида рухсат этилган ҳар қандай шаклда тадбиркорлик фаолиятини амалга оширувчи, «Умра» тадбирларини ташкил этиш бўйича махсус лицензияга эга бўлган (Ўзбекистон Республикаси Вазирлар Маҳкамасининг 668-сон қарори асосида), ўз турпакетларини Платформада жойлаштирувчи ҳамда Платформага бекор қилиш, пул маблағларини қайтариш ва зиёратчини алмаштириш шартлари кўрсатилган туристик хизматлар кўрсатиш бўйича ўз шартномасини юкловчи шахс.
Фойдаланувчи — Платформадан зиёрат турлари ҳақидаги маълумотларни қидириш, кўриш ва таққослаш учун фойдаланувчи жисмоний шахс.
Мижоз — ўзи учун ва/ёки учинчи шахслар (Ҳамроҳлар) манфаатларида зиёрат турини брон қилиш учун аризани расмийлаштирган ва тўлаган Фойдаланувчи.
Ҳамроҳ — манфаатларида Мижоз зиёрат турини расмийлаштирадиган ва шахсга доир маълумотларини Мижоз Платформага киритадиган учинчи шахс.
Зиёрат тури (Турпакет) — фақат Мерчант томонидан шакллантириладиган, сотиладиган ва бажариладиган туристик ва диний хизматлар мажмуи (виза, парвоз, трансфер, меҳмонхона, гид).
Тўлов тизими — Платформага интеграциялашган тўловларни қабул қилиш хизмати (масалан, CLICK), тўловни қабул қилишни ва тўлов суммасини техник тақсимлашни (сплит), шунингдек тегишли буйруқлар бўйича маблағларни қайтаришни (реверс) амалга оширади.
Сплит — Тўлов тизими томонидан тўлов пайтида тўлов суммасининг олдиндан созланган қоидаларга мувофиқ Мерчант ва Агрегатор ўртасида автоматик тақсимланиши. Агрегатор Мижозларнинг пул маблағларини ўз ҳисобварақларида жамғармайди.
Реверс (қайтариш) — аризанинг бекор қилиниши натижасида келиб тушган буйруқ асосида бошланадиган, Тўлов тизими томонидан Мижозга олдин тўланган суммани қайтариш операцияси.

2. ПЛАТФОРМАНИНГ ҲУҚУҚИЙ МАҚОМИ

2.1. Агрегатор фақат ахборот-технологик хизматларни (Платформа инфратузилмасини) тақдим этади ва Ўзбекистон Республикасининг «Электрон тижорат тўғрисида»ги Қонуни доирасида фаолият юритади.

2.2. Агрегатор туроператор, турагент ёки тўлов агенти ҳисобланмайди, туристик, экскурсия ёки диний хизматлар кўрсатмайди, зиёрат турларини шакллантирмайди ва Мижоз билан Мерчант ўртасидаги турни олди-сотди битимининг томони сифатида иштирок этмайди. Агрегатор Фойдаланувчиларнинг пул маблағларини ўз ҳисобварақларида жамғармайди, ушлаб қолмайди ва сақламайди. Тўловни техник тақсимлаш (сплит) ва маблағларни қайтариш Тўлов тизими томонидан олдиндан созланган қоидалар ва келиб тушган буйруқлар асосида амалга оширилади; Агрегатор томонидан бундай қоидаларнинг техник созланиши уни ҳисоб-китобларнинг томони ёки тўлов агенти қилмайди.

2.3. Туристик маҳсулотни (зиёрат турини) сотиш тўғрисидаги шартнома бевосита Мижоз ва аниқ Мерчант ўртасида тузилади. Шартнома Мижоз танланган тур учун тўловни амалга оширган пайтда тузилган ҳисобланади. Турни бажариш бўйича барча ҳуқуқлар, мажбуриятлар ва юридик жавобгарлик фақат Мерчантда вужудга келади.

2.4. Тўлов амалга оширилгунга қадар Мижозга Платформа интерфейсида шартнома тузиладиган Мерчант тўғрисидаги маълумотлар (номи, реквизитлари, «Умра» тадбирларини ташкил этиш лицензияси рақами), шунингдек Мерчантнинг туристик хизматлар кўрсатиш шартномаси матни тақдим этилади. Зиёрат турпакетини танлаш ва шакллантиришда Мижоз тегишли Мерчант шартномасининг шартлари, жумладан бекор қилиш, пул маблағларини қайтариш ва зиёратчини алмаштириш бўлими билан танишиши шарт. Розилик белгисини («галочка») қўйиш ёки тўловни амалга ошириш Мерчант шартномаси шартларининг, истеъмолчилар ҳуқуқларини ҳимоя қилиш тўғрисидаги қонунчиликнинг императив нормаларига зид бўлмаган қисмида, аксепти деб эътироф этилади.

2.5. Мерчантларнинг шартномалари Платформада Платформа фаолият юритаётган тилларда жойлаштирилади.

2.6. Агрегатор Мерчант ва Мижоз ўртасидаги битим бўйича ҳаммуаллиф, кафил ёки агент ҳисобланмайди ҳамда Мижознинг Мерчант шартномаси шартлари билан танишмаганлиги ёки уларни тўлиқ тушунмаганлиги оқибатида юзага келган даъволар учун жавобгарлик кўтармайди.

3. ТОМОНЛАРНИНГ ҲУҚУҚ ВА МАЖБУРИЯТЛАРИ

3.1. Фойдаланувчи (Мижоз) мажбурият олади:

Зиёрат турларини брон қилиш ва тўлашни Ўзбекистон Республикаси қонунчилиги талабларига, жумладан муомала лаёқатига оид талабларга мувофиқ амалга ошириш. Кўрсатилган талабларга риоя қилиш учун жавобгарликни Мижоз кўтаради.
Ҳамроҳларнинг маълумотларини Ўзбекистон Республикаси қонунчилиги талабларига, жумладан ёш ва муомала лаёқатига оид талабларга мувофиқ киритиш. Ҳамроҳлар маълумотларини киритишнинг қонунийлиги ва тақдим этилган маълумотларнинг ҳаққонийлиги учун жавобгарликни Мижоз кўтаради.
Рўйхатдан ўтишда ва брон қилишда ҳаққоний, долзарб ва тўлиқ шахсга доир маълумотларни (ўзиники ва Ҳамроҳларникини) мазкур Келишувнинг 6-бўлимига мувофиқ тақдим этиш.
Ҳар бир Ҳамроҳнинг шахсга доир маълумотларини мазкур Келишув шартларида қайта ишлаш ва узатишга розилиги Ўзбекистон Республикаси қонунчилигида белгиланган тартибда олинганлигини кафолатлаш. Бундай розилик мавжуд бўлмаганлиги учун жавобгарликни Мижоз кўтаради.
Шахсий кабинет логин ва паролининг сақланишини мустақил равишда таъминлаш. Шахсий кабинетдан амалга оширилган ҳар қандай ҳаракатлар Фойдаланувчи томонидан шахсан содир этилган деб эътироф этилади.
Танланган турлар учун тўловни интеграциялашган Тўлов тизими орқали ўз вақтида ва тўлиқ ҳажмда амалга ошириш.
Зиёратни амалга ошириш учун зарур бўлган чет эл паспортлари, виза режимлари ва тиббий талабларни мустақил равишда текшириш.
Аризани расмийлаштиришдан олдин тегишли Мерчант шартномасининг шартлари, жумладан бекор қилиш, қайтариш ва зиёратчини алмаштириш шартлари билан танишиш.

3.2. Фойдаланувчи (Мижоз) ҳуқуққа эга:

Платформанинг ахборот функсионалидан турларни қидириш, таққослаш ва турларни шакллантириш учун аризалар юбориш мақсадида бепул фойдаланиш.
Шахсий кабинет ва Платформа интерфейси фаолияти бўйича техник ёрдам олиш.
Мерчантга Платформа интерфейси орқали шартномани бажариш билан боғлиқ расмий мурожаатлар юбориш: турни ташкил этиш ва ўтказиш масалалари; брон қилинган турни бекор қилиш (аннуляция) тўғрисидаги аризалар; пул маблағларини қайтариш сўровлари; Ҳамроҳни алмаштириш аризалари; Мерчант кўрсатган хизматлар сифатига даъволар.
Томонлар Шахсий кабинет орқали мурожаатлар юборишни Мижоз ва Мерчант ўртасидаги расмий ва устувор алоқа усули деб эътироф этадилар. Бундай мурожаатлар Мерчант кабинетига қайта йўналтирилади; Платформа уларнинг юборилган факти ва вақтини қайд этади.
Агар Мерчант Мижознинг мурожаатига жавоб бермаса, Мижоз Платформанинг техник ёрдам хизматига мурожаат қилиш ҳуқуқига эга. Платформа мурожаатни рўйхатга олади ва уни Мерчантга узатиш ҳамда эскалация қилишда кўмаклашади. Бунда Платформа Мерчантнинг мажбуриятларини ўз зиммасига олмайди, Мерчант томонидан у ёки бу қарор қабул қилинишини ва пул маблағларининг қайтарилишини кафолатламайди; мурожаатларни Мерчант томонидан кўриб чиқиш муддатлари Мерчант ва Агрегатор ўртасидаги шартнома билан белгиланади.

3.3. Агрегатор мажбурият олади:

Режали техник ва профилактика ишлари даврлари бундан мустасно, Платформанинг ишлашини таъминлаш.
Мижоз томонидан шакллантирилган аризаларни ва тўловлар тўғрисидаги маълумотларни АТ-инфратузилма орқали тегишли Мерчантга ўз вақтида узатиш.
Мижознинг Шахсий кабинет орқали юборилган мурожаатлари фактини ва вақтини техник жиҳатдан қайд этиш.

3.4. Агрегатор ҳуқуққа эга:

Фирибгарлик, маълумотларни парсинг қилиш ёки мазкур Келишув шартларини бузишда асосли шубҳа бўлганда рўйхатдан ўтказишни рад этиш ёки Фойдаланувчининг Шахсий кабинетини блоклаш. Блоклаш Мижозни аллақачон тўланган турлар бўйича масалаларни ҳал қилиш, жумладан қайтариш тўғрисидаги мурожаатлар имкониятидан маҳрум қилмайди.
Платформанинг дизайни, интерфейси ва ишлаш алгоритмларини, шунингдек мазкур Келишув шартларини 9-бўлимда белгиланган тартибда бир томонлама ўзгартириш.

4. ТЎЛОВ ТАРТИБИ, ҲАҚ ВА МАБЛАҒЛАРНИ ҚАЙТАРИШ

4.1. Барча тўловлар Мижоз томонидан интеграциялашган Тўлов тизими орқали нақд пулсиз тартибда амалга оширилади. Мижоз танланган тур қийматини тўлайди. Агрегаторнинг ҳақи тур қийматига киритилган бўлиб, Мижоздан қўшимча равишда ундирилмайди.

4.2. Тўлов пайтида Тўлов тизими сплитни — сумманинг олдиндан созланган қоидаларга мувофиқ Мерчант ва Агрегатор ўртасида автоматик тақсимланишини амалга оширади. Агрегатор Мижозларнинг маблағларини жамғармайди; Агрегаторнинг ҳақи тур қийматига киритилган улуш бўлиб, Тўлов тизими томонида Мерчантга тегишли суммадан ушлаб қолинади.

4.3. Пул маблағларини қайтариш Мерчант томонидан бошланади, мазкур Келишувнинг 4.4-бандида назарда тутилган аризани автоматик бекор қилиш ҳолати бундан мустасно. Мерчант қайтариш тўғрисида қарор қабул қилганда Платформа интерфейсида тегишли буйруқ шакллантирилади, унинг асосида Платформада ариза бекор қилинади, қайтариш эса интеграциялашган Тўлов тизими орқали ёки Мерчантнинг Мижоз билан шартномасида назарда тутилган бошқа усулда амалга оширилади.

4.4. Мерчант брон қилиш учун аризани (уни тасдиқлаш ёки рад этиш) у келиб тушган пайтдан бошлаб 72 (етмиш икки) соат ичида кўриб чиқиши шарт; дам олиш ва байрам кунлари кўрсатилган муддатга киритилмайди. Агар кўрсатилган муддат ичида ариза Мерчант томонидан кўриб чиқилмаса, Платформа аризани автоматик равишда бекор қилади, Мижоз тўлаган сумма эса Мижозга тўлиқ ҳажмда (100%) қайтарилиши лозим.

4.5. Агар Мерчант брон қилиш учун аризани рад эца (жумладан бўш ўринлар мавжуд эмаслиги сабабли), Мижоз тўлаган сумма Мижозга тўлиқ ҳажмда (100%) қайтарилиши лозим.

4.6. Агар мазкур Келишувнинг 4.4 ва 4.5-бандларида бошқача тартиб назарда тутилмаган бўлса, бронни бекор қилиш ва пул маблағларини қайтариш Мерчант томонидан турпакет сотиб олинган пайтда амал қилган Мерчант ва Мижоз ўртасидаги шартнома шартларига мувофиқ амалга оширилади. Қайтарилиши лозим бўлган сумма миқдори, уни тўлаш муддатлари ва тартиби тўлиқ равишда Мерчант томонидан кўрсатилган шартномада белгиланган қайтариш шартлари билан аниқланади. Агрегатор қайтариладиган суммаларни мустақил ҳисоблаб чиқмайди ва тўловларнинг ташаббускори ҳисобланмайди.

4.7. Мижоз томонидан бекор қилиш ва қайтариш тўғрисидаги мурожаат юборилган сана ва вақт Платформа тизими томонидан қайд этилади. Қайтариш шартлари мурожаат юборилган пайтга кўра белгиланади, унинг Мерчант томонидан ҳақиқатда кўриб чиқилган пайтига кўра эмас.

4.8. Тур Мерчантнинг айби билан бекор қилинганда, Мижоз жавобгар бўлмаган ҳолатлар сабабли уни бажариш имконсиз бўлганда, шунингдек истеъмолчилар ҳуқуқларини ҳимоя қилиш тўғрисидаги қонунчиликда назарда тутилган бошқа ҳолларда Мижоз Мерчант шартномаси шартларидан қатъи назар, ушбу қонунчиликда белгиланган ҳажмда қайтариш ҳуқуқини сақлаб қолади.

4.9. Аризани кўриб чиқиш муддати ўтиши муносабати билан уни автоматик бекор қилиш (4.4-банд) бундан мустасно, Агрегатор аризаларни бекор қилишни ва маблағларни қайтаришни мустақил равишда бошламайди. Бошқа ҳолларда Платформа томонида аризани техник бекор қилиш Агрегатор томонидан фақат Мерчантнинг расмий сўрови асосида амалга оширилади.

4.10. Фискал чек (тўловни тасдиқловчи ҳужжат) Ўзбекистон Республикаси қонунчилигига мувофиқ интеграциялашган Тўлов тизими (тўлов агрегатори) орқали шакллантирилади.

5. ИНТЕЛЛЕКТУАЛ МУЛК

5.1. Платформанинг дизайни, график элементлари, логотиплари, дастурий коди ва маълумотлар базалари тузилмаси «RUVEX» МЧЖнинг интеллектуал мулки ҳисобланади ва Ўзбекистон Республикасининг «Муаллифлик ҳуқуқи ва турдош ҳуқуқлар тўғрисида»ги Қонуни билан ҳимояланади. Платформа элементларини ҳар қандай нусхалаш, юклаб олиш (парсинг) ёки ўзгартириш тақиқланади.

5.2. Платформада шарҳлар, изоҳлар ёки фотосуратлар жойлаштириш орқали Фойдаланувчи Агрегаторга ушбу контентдан Платформанинг маркетинг мақсадларида фойдаланиш учун текин, мутлақ бўлмаган лицензия беради. Фойдаланувчи жойлаштирилаётган контент учинчи шахсларнинг ҳуқуқларини бузмаслигини, тасвирларда бошқа шахслар мавжуд бўлганда эса — уларнинг розилиги олинганлигини кафолатлайди.

6. ШАХСГА ДОИР МАЪЛУМОТЛАР

6.1. Мазкур Келишувни аксепт қилиш орқали Мижоз зиёрат турини расмийлаштириш ва бажариш мақсадида ўзининг ва Ҳамроҳларнинг шахсга доир маълумотларини қайта ишлашга розилик беради. Шахсга доир маълумотларни йиғиш, сақлаш, ишлатиш ва узатиш тартиби umrabor.uz/p/privacy манзилида жойлаштирилган ва мазкур Келишувнинг ажралмас қисми ҳисобланган «RUVEX» МЧЖнинг Махфийлик ва шахсга доир маълумотларни қайта ишлаш сиёсати билан белгиланади.

6.2. Агрегатор шахсга доир маълумотлар оператори ҳисобланади. Шахсга доир маълумотларни йиғиш, тизимлаштириш ва сақлаш Ўзбекистон Республикаси ҳудудида жисмонан жойлашган маълумотлар базаларидан фойдаланган ҳолда амалга оширилади. Йиғилган маълумотлар туристик хизматлар кўрсатиш учун зарур ҳажмда тегишли Мерчантга узатилади; узатилган пайтдан бошлаб Мерчант мустақил оператор бўлади ва маълумотларни ўз жавобгарлиги остида қайта ишлайди.

6.3. Мижоз Ҳамроҳларнинг шахсга доир маълумотларини қонуний равишда киритганлигини ҳамда уларни қайта ишлашга, жумладан турни бажариш учун зарур бўлган трансчегаравий узатишга (хусусан, Саудия Арабистони Подшолиги визасини расмийлаштириш учун) розилик Ўзбекистон Республикаси қонунчилигида белгиланган тартибда олинганлигини кафолатлайди. Бундай розилик мавжуд бўлмаганлиги учун жавобгарликни Мижоз Сиёсатга мувофиқ кўтаради.

7. АГРЕГАТОР ЖАВОБГАРЛИГИНИНГ ЧЕКЛАНИШИ

7.1. Агрегатор турлар, нархлар, меҳмонхоналардаги ўринлар ва авиачипталар мавжудлиги тўғрисидаги маълумотларнинг ҳаққонийлиги, долзарблиги ва тўлиқлиги учун жавобгар эмас, чунки ушбу контент Мерчантлар томонидан мустақил равишда юкланади.

7.2. Агрегатор тур давомида Мижозга ёки Ҳамроҳларга етказилган зарар учун жавобгар эмас, жумладан, лекин улар билан чекланмаган ҳолда: авиарейсларнинг бекор қилиниши, кўчирилиши ёки кечикиши ва юкларнинг йўқолиши; яшаш шароитларининг эълон қилинган тавсифларга мос келмаслиги; гидлар, гуруҳ раҳбарлари ва Мерчант вакилларининг ҳаракатлари ёки ҳаракацизлиги; давлат органларининг (жумладан Саудия Арабистони Подшолиги) виза беришни ёки чегарани кесиб ўтишни рад этиши.

7.3. Агрегатор хостинг-провайдерлар, интернет-операторлар, экваер-банклар ёки Тўлов тизими томонидаги техник узилишлар учун жавобгар эмас, агар улар Платформадан фойдаланиш имконсизлигига ёки кўрсатилган шахслар томонида тўловларни амалга оширишда узилишларга олиб келган бўлса.

8. ФОРС-МАЖОР

8.1. Томонлар мажбуриятларни бажармаганлик ёки лозим даражада бажармаганлик учун жавобгарликдан озод қилинадилар, агар бу мазкур Келишув аксептидан кейин юзага келган енгиб бўлмас куч ҳолатлари (табиий офатлар, ҳарбий ҳаракатлар, ҳокимият органларининг ҳужжатлари, магистрал алоқа ва электр таъминоти тармоқларидаги узилишлар ва фавқулодда тусдаги бошқа воқеалар) туфайли юзага келган бўлса.

8.2. Кўрсатилган ҳолатлардан ташқари, Томонлар енгиб бўлмас куч ҳолатларига зиёратни ташкил этишга таъсир қилувчи махсус тартибга солувчи воқеаларни ҳам киритадилар: Саудия Арабистони Подшолиги ёки Ўзбекистон Республикасининг ваколатли органлари томонидан «Умра» квоталарининг бекор қилиниши, қисқартирилиши ёки тўхтатилиши; ҳаво ҳудудининг ёпилиши; зиёрат жойларида фавқулодда санитария-эпидемиологик чекловларнинг жорий этилиши.

8.3. Енгиб бўлмас куч ҳолатларининг брон қилинган тур учун оқибатлари (жумладан турни кўчириш, алмаштириш ёки бекор қилиш ва Мижоз билан ҳисоб-китоб тартиби) Мерчант ва Мижоз ўртасидаги шартнома ҳамда Ўзбекистон Республикаси қонунчилиги билан белгиланади.

9. НИЗОЛАРНИ ҲАЛ ҚИЛИШ ВА КЕЛИШУВГА ЎЗГАРТИРИШ КИРИТИШ ТАРТИБИ

9.1. Фойдаланувчи ва Агрегатор ўртасида Платформа фаолияти масалалари бўйича низолар судгача даъво тартибида ҳал қилинади. Ёзма даъвони кўриб чиқиш муддати — у info@umrabor.uz манзилига келиб тушган кундан бошлаб 15 (ўн беш) календар кун.

9.2. Келишувга эришилмаган тақдирда низо Ўзбекистон Республикасининг амалдаги қонунчилигига мувофиқ судда кўриб чиқилиши лозим. Мазкур қоида Фойдаланувчи-истеъмолчининг истеъмолчилар ҳуқуқларини ҳимоя қилиш тўғрисидаги қонунчиликда белгиланган судлов қоидалари бўйича даъво қўзғатиш ҳуқуқларини чекламайди.

9.3. Зиёрат турининг сифациз кўрсатилиши ёки кўрсатилмаганлигидан келиб чиқадиган низолар ва даъволарни Мижоз бевосита Мерчант билан ҳал қилади.

9.4. Агрегатор мазкур Келишувга бир томонлама тартибда ўзгартиришлар киритиш ҳуқуқига эга. Жиддий ўзгартиришлар киритилганда Агрегатор Фойдаланувчиларни Платформада тегишли хабарномани жойлаштириш йўли билан хабардор қилади. Ўзгартиришлар янги таҳрир эълон қилинган пайтдан кучга киради.

10. ЯКУНИЙ ҚОИДАЛАР

10.1. Мазкур Келишув Фойдаланувчи учун у аксепт қилган пайтдан кучга киради ва муддациз амал қилади.

10.2. Мазкур Келишув ўзбек, рус ва инглиз тилларида тайёрланган ва мавжуд. Фойдаланувчига Платформа интерфейсининг танланган тилига мос келадиган Келишув версияси кўрсатилади. Барча тил версиялари бир хил юридик кучга эга.

11. АГРЕГАТОР РЕКВИЗИТЛАРИ

«RUVEX» масъулияти чекланган жамияти — UMRABOR платформасининг эгаси

Юридик манзил: Тошкент шаҳри, Яккасарой тумани, Муҳандислар МФЙ, Ш. Руставели кўчаси, 53

Ҳ/р: 20208000007339694001, «Asia Alliance Bank» АТБ

МФО: 01095 СТИР: 312527894 ИФУТ: 62010

Директор: Мамажанов Рустам Юсупжанович

E-mail: info@umrabor.uz